hver er fjölhæfasti bóndi Norðurlands?

Ég missti sko af þessum lið á Sveitasælu 2008 og líka gröfumanni ársins. Ég vona bara að það fréttist sem fyrst hverjir hampa þessum titlum - fleiri góðar keppnir í gangi en Ólympíuleikarnir. Til dæmis Hólympíuleikarnir, sem eru víst rétt handan við hornið...

sagan endurtekur sig

karlarnir gleyma að tala við konurnar sem voru þó með þeim í framboði!

Marsibil styður ekki nýjan meirihluta

fáránlegt

frá upphafi til enda hvernig borgarstjórnarmálin hafa þróast. Er eitthvað sennilegra að trúnaður ríki milli Framsóknar og Sjálfstæðismanna nú en áður? Eða milli borgarfulltrúa Sjálfstæðisflokksins innbyrðis?

Nýr meirihluti að fæðast

síðsumar á Hólum

flestir kennarar Háskólans á Hólum komnir úr sumarfríinu sínu og sitja nú missólbrúnir en flestir sællegir, við að leggja síðustu hönd á skipulag námskeiðanna á haustönn. Það er alltaf veruleg skemmtilegt, svolítið eins og að skrifa handrit að leikriti og sjá fyrir sér hvernig þetta gæti allt smollið saman í upplifun (nám) sem skiptir máli. Ég nota Moodle vefumhverfið til að setja námskeiðin upp og mér finnst orðið ómissandi að hafa svona vef fyrir námskeiðin hvort sem þau eru kennd í staðnámi eða fjarnámi. Ég sé að nemendur eru farnir að skrá sig inn svo það eru fleiri en við kennararnir komnir í gírinn. Annars ætti fólk náttúrlega að eyða þessum síðustu dögum sumarsins í berjamó og sveppaskóg - hér er allt blátt af berjum og fullt af lerki - og furusveppum sem geta verið veruleg búdrýgindi.

sorglegt

hugsunarleysi og tillitsleysi. Fyrir nokkurra stunda skemmtun eru einhverjir búnir að spilla fegurð landsins, spilla ímynd þeirra sem stunda akstursíþróttir og vinna þannig óbætanlegt tjón bæði á náttúru landsins og menningu. Það er kominn tími til að gera átak í umræðu og fræðslu um ábyrgð okkar gagnvart umhverfinu.

Óbætanlegar skemmdir hjá Landmannalaugum

til þess, sem málið varðar:

Ef þú gast borið þennan bauk - eða hinn, fullan uppá fjöll þá munar ekki um hann tóman til baka. Bara stíga á hann og stinga honum í vasann og koma í endurvinnslu. Ekki ímynda þér að þú getur stungið honum undir stein og hann liggi þar kyrr næstu áratugi, hann poppar upp í næstu frostlyftingu sem vitnisburður um sóðaskap þinn, eða einhvers af öllum hinum strútunum sem stinga höfðinu í sandinn og bauknum undir stein...

ég var túristi í Reykjavík

í einn dag í síðustu viku. Það var að mörgu leyti fjarskalega notalegt, ég rölti um miðborgina í glampandi sól og hita og settist svo sólarmegin í Vallarstrætinu með hvítvínsglas við öldurhús. Hinum megin við hekkið var fólk að leika sér og enginn orðinn fullur enn. Við sátum þarna dönnuð í sumardressunum, með designer sólgleraugun og orðnir forframaðri en svo að fækka fötum og snúa andlitinu mót sól. En yfir Alþingisreitnum frá mér séð sveimaði mávager. Ég veit náttúrlega betur en svo að þeir hafi verið að snapa einhvert rusl þar, líklegra að þeir sitji um litlu andarungana sem allir bretta stél á Tjörninni og brauðið sem þeim er ætlað. Samt settu þeir annan og ískyggilegri svip á sólardaginn, rétt eins og ruslið sem loddi þegar að var gáð í öllum runnum, hornum og ræsum við hinn virðulega Austurvöll. Plastglös, servíettur, sígarettur, gosflöskur, ölflöskur - setja svip á miðborgina jafnt sem hvern vegkant um allt landið sem er fagurt sem fyrr en ef til vill ekki svo hreint. Þarna sátum við svo sæt í sólinni, sóðarnir og það hvarflar að manni hvort eitthvað sé rotið in the state of...

lúpína

er umdeild jurt en hún hefur unnið á í mínum huga eftir því sem ég kynnist henni nánar. Í fyrsta lagi er mér hlýtt til hennar af því systir mín hafði svo gott af lúpínuseyði þegar hún var í meðferð við krabbameini. Og svo er ótrúlega skemmtilegt að ríða gegnum lúpínubreiðu. Í fyrrakvöld riðum við Helgi niður í Tungu (milli Kolbeinsdalsár og Hjaltadalsár) um sólarlag á þá verður liturinn auðvitað ótrúlegur að ekki sé tala um ilminn. Svona er þetta, nýir gestir í náttúrunni verða smám saman heimakomnir hvort sem er um að ræða jurtir eða dýr sem ná hér fótfestu.

Faraldsfótur

er hitt bloggið mitt og það er bara um góðar upplifanir af ferðalögum og ferðaþjónustu hér innanlands - útfrá mínu sjónarhorni sjá http://faraldsfotur.blog.is/blog/faraldsfotur/

jónsmessuhelgin

var mér og mínum góð þetta árið - sól og blíða, frábær gönguferð á Jónsmessuhátíðinni á Hofsósi. 165 manns gengu og fleiri til komu í Höfðaborg að borða kjötsúpu. Kvöldskemmtun með sínum fínu heimatilbúnu skemmtiatriðum og einum atvinnugrínara en ég er að verða svo rosalega sveitó að mér finnst mitt fólk bara fyndnast. Helgi minn er agalega líkur Ólafi Ragnari ef hann vill það við hafa og Veiga er greinilega andlega skyld Dorrit! Svo er þessi ísbjarnarblús auðvitað algjört grín, gráhvítt gaman.