ég vildi vera á Akureyri

á morgun. Það er reyndar svolítið framandi tilfinning, viðurkenni það að mér líður nú allajafna betur í næstu sveit eða fyrir vestan eins og þeir segja fyrir norðan. Það er ekki bara útaf því hvað mælist mikið jafnrétti á Akureyri, nei þetta er einsog hver önnur sólarhringspest og tengist því að á morgun verður merkilegt málþing við Háskólann á Akureyri um íslensku í háskólum. Það er reyndar ekkert svo jafnréttislegt, það tala bara kallar þar en þeir munu tala um mikilvægt mál - íslenskuna sem samskiptamál í fræðaheiminum. Veitir kannski ekki af, á auglýsingaborðanum á þessum miðli má m.a. lesa eftirfarandi skilaboð frá íslenskum háskóla; taught completely in english og ég tók eftir því þegar ég var að tékka á dagskrá málþingsins góða sem ég kemst því miður ekki á, að slóðin á vef Háskólans á Akureyri er www.unak.is sem stendur væntanlega fyrir University in Akureyri. Sú skoðun er víða uppi nú um stundir að það sé miklu betra á tímum hnattvæðingar að nota ensku sem samskiptamál. Það á við þegar viðmælendur eiga það mál eitt sameiginlegt - en enskan er bara eitt af þeim málum sem við höfum til að hugsa á. Það að hugsa á fleiri en einu tungumáli er ekki bara spurning um þýðingu hugtaka og hugmynda heldur er það skapandi, býður uppá fleiri sjónarhorn og þarmeð fleiri túlkunar og mögulegan skilning. Tungumál er menningararfur - okkur var trúað fyrir þessu tungumáli, við fengum það í vöggugjöf og það er okkar mál.

Athugasemdir

[Lára Hanna Einarsdóttir, 12.4.2008 kl. 23:39]

Íslensk tunga er mér mikið hjartans mál og ég hef litið hornauga þessa minnimáttarkennd að vilja ekki eða geta ekki notað hana í háskólum og víðar þar sem tekin hefur verið upp enska sem kennslu- eða samskiptamál. Þetta veldur því að tungumálið glatast smátt og smátt, það held ég að sé ekki spurning.

Við lestur á pistlinum þínum verður mér hugsað til greinar sem ég las fyrir mörgum árum í tímariti Íslenskrar málnefndar, Málfregnum (19:2000), sem ég er áskrifandi að. Greinin var unnin upp úr fyrirlestri sem dr. Matthew Whelpton, dósent við Háskóla Íslands, flutti á ráðstefnu um íslensku sem annað tungumál, ef ég man rétt.

Greinin er hér og gaman væri að heyra hvað þér finnst um hana, Guðrún.

[Guðrún Helgadóttir, 14.4.2008 kl. 11:13]

Þetta er mjög skemmtileg grein, Lára Hanna og kemur sér vel að fá að sjá hana í dag því á morgun er ég að fara að flytja fyrirlestur sem þessi grein er alveg hugljómun fyrir.

[Lára Hanna Einarsdóttir, 14.4.2008 kl. 11:19]

Gaman að heyra, Guðrún. Hvar flyturðu fyrirlesturinn og hvað ætlarðu að fjalla um?