þorrablót Hóla- og Viðvíkurhreppa

var í Höfðaborg á laugardaginn og ég skemmti mér vel - enda fékk ég að troða upp, herma eftir nágrönnunum og fara með allskonar bull og vitleysu um hagi þeirra, háskólann og hundanna í sveitinni. Þorrablótsnefnd er nefnilega ekki bara ekkert mannlegt óviðkomandi, henni ber skylda til að fylgjast með högum húsdýranna líka. Enda getur það vel farið saman, hamingja manna og dýra.

Hér kemur hver fjölskylda og hennar gestir með sinn þorramat í trogi - stundum slæðist eitthvað óþjóðlegra með í trogið ef útlit er fyrir að gestirnir svelti öðrum kosti. Sést hafa kótelettur, kjúklingalæri og jafnvel flatbökur innan um súra punga, magála og svið!

Eftir borðhaldið og heimalagaða skemmtidagskrá eru tekin upp borðin af dansgólfinu og sett í hliðarsalina og svo er dansað fram á morgun. Höfðaborg er almennilegt félagsheimili með alvöru dansgólfi og það er vel nýtt á svona kvöldi. Eins gott að kvenfólkið er búið að vera að æfa boot camp og karlarnir vanir að glíma við naut og hver annan í bandý þannig að almennt úthald var með betra móti.

Athugasemdir

[Edda Agnarsdóttir, 12.2.2008 kl. 16:36]

Er á leiðinni á Þorrablót um næstu helgi að Miðgarði í Innri -Akraneshreppi sem er held ég núna orðin Hvalfjarðarsveit.

[Þórður Ingi Bjarnason, 12.2.2008 kl. 19:53]

Takk fyrir síðast þetta var frábært þorrablót.  Þú stóðst þig vel í að segja á gaman saman hátt í nágrönum okkar.

kv

Þórður Ingi