svona góður hríðardagur

Ég er nú lúmskt ánægð með þessa hríð, var farin að sakna þess að hafa ekki kafsnjó. Átti ljúfa endurfundi við Nokiastígvélin áðan til að geta öslað snjóinn milli húsa, ef þetta tekur ekki strax upp verður fínasta gönguskíðafæri í Hólaskógi næstu daga. Auðvitað er þetta bölvað vesen, lokað í Tindastól vegna veðurs og varð að fresta Vinnuvöku skagfirskra kvenna og svo getur nú verið að fari mesti glansinn af hríðinni þegar við Helgi förum að huga að því að komast á leikæfingu útí Hofsós á eftir. Ég skil samt alveg konugreyið í Gullna hliðinu sem var orðin hundleið á öllu blíðviðrinu í himnaríki...

Athugasemdir

[Gunnar Páll Pálsson (IP-tala skráð) 18.3.2007 kl. 16:26]

...nú er horfið norðurland og glæður skíðadraumanna slökknaðar. Það eru fáir staðir ef nokkur sem jafnast á við Hólaskóg þegar kemur að gönguskíðum. Bendi ég á meðfylgjandi mynd til sönnunar: http://gunster.blog.is/album/Holarimaliogmynd/image/150629/

Með öfund, Gunnar P.